ဘီပိုးကာကွယ်ဆေးနှင့် သစ္စာသွေးလှူရှင်များ

မြန်မာဘရူဝါရီကုမ္ပဏီလီမီတက်၏ ကရုဏာရှေ့ရှုမြန်မာမှုအစီအစဉ်ဖြင့် စေတနာရှင်သွေးလှူဒါန်းသူများကို ဘီပိုးကာကွယ်ဆေး ထိုးပေးခြင်းအခမ်းအနားကို (၃၁-၈-၂၀၁၀)၊ နံနက်(၉)နာရီတွင် ဒေသကွပ်ကဲမှုစစ်ဌာနချုပ်(ကလေး)၊ အောင်ဇေယျခန်းမတွင် ပြုလုပ်ခဲ့ပါသည်။ အဆိုပါအခမ်းအနားသို့ ကလေးမြို့ ဒေသကွပ်ကဲရေးမှူး၊ ဒု-ဒ.က.စမှူးနှင့် ဒေသအာဏာပိုင်များ၊ ကျန်းမာရေးဝန်ထမ်းများ၊ အမျိုးသားသွေးလှူဘဏ်ဥက္ကဋ္ဌ ဒေါက်တာသီတာအောင်၊ မြန်မာဘရူဝါရီကုမ္ပဏီမှ မန်းနေးဂျင်းဒါရိုက်တာနှင့် အဖွဲ့သားများ၊ သစ္စာသွေးလှူရှင်များမှ ဦးဆောင်ဆရာတော်၊ အကျိုးဆောင်ကော်မတီများနှင့် သစ္စာသွေးလှူသူ စေတနာရှင်များ၊ ZYA ခရစ်ယာန်အဖွဲ့ သွေးလှူရှင်များနှင့် အကျိုးဆောင်များ၊ ဂျာနယ်အချို့၏ ဒေသတွင်း သတင်းထောက်များ တက်ရောက်ခဲ့ကြပါသည်။

ကလေးမြို့တွင် မြို့ကြီးများကဲ့သို့ သွေးထိန်းဘဏ်များ မရှိသည့်အတွက် သစ္စာသွေးလှူရှင်များကဲ့သို့သော စေတနာသွေးလှူရှင်များကို အားထားနေရသည်မှာ ယနေ့ထိအတိုင်ဖြစ်ပါသည်။ သွေးလိုအပ်သော လူနာများအနေဖြင့် အရေးအပေါ်အခြေအနေများတွင် လိုအပ်သော သွေးကို အချိန်မီရရှိနိုင်ရန် အလွန်အရေးကြီးလှပါသည်။ ယခင်က အနီးအနားမှ စေတနာရှင်များအပေါ် မှီခိုနေကြရာမှ ယခုကဲ့သို သစ္စာသွေးလှူရှင်များ ပေါ်ပေါက်လာသောအခါ လွန်စွာအဆင်ပြေခဲ့ပေသည်။ သို့သော်လည်း စေတနာရှင်သွေးလှူဒါန်းသူများ၏ သွေးမှာ သန့်ရှင်းနေစေရန် အလွန်လိုအပ်လှပါသည်။ HIV ပိုး ဘီပိုးကဲ့သို့သော ရောဂါပိုးများ မကူးစေရန်နှင့် ရောဂါပိုးသန့်ရှင်းသော သွေးများ လှူဒါန်းနိုင်ရန်အတွက် သစ္စာသွေးလှူရှင်များအနေဖြင့်လည်း ကြိုးပမ်းဆောင်ရွက်နေကြပါသည်။ ယခုအခါ မြန်မာဘရူဝါရီကုမ္ပဏီ၏ ကရုဏာရှေ့ရှုမြန်မာမှု အစီအစဉ်ဖြင့် လှူဒါန်းသော ဘီပိုးကာကွယ်ဆေးများကို သစ္စာသွေးလှူရှင်များထဲမှ ပြည်သူ့ဆေးရုံကြီးတွင် သွေးလှူဒါန်းပြီးကြသူများကို မဲစနစ်ဖြင့် သစ္စာသွေးလှူရှင်ဦးရေ (၁၈၀၀)ထဲမှ (၃၄၁)ဦးကို ကာကွယ်ဆေးထိုးပေးခဲ့ပါသည်။ နောက်နောင်များတွင်လည်း ရံပုံငွေအခြေအနေပေါ်မူတည်၍ သစ္စာသွေးလှူရှင်များအား ယခုကဲ့သို့ ကာကွယ်ဆေးများ ထိုးခြင်းအစီအစဉ်ကို ဆောင်ရွက်သွားကြရန် ကြိုးပမ်းနေကြပါသည်။ ဘီပိုးကာကွယ်ဆေး အလှူရှင်များကို ဖိတ်ခေါ်အပ်ပါသည်။

ဓာတ်ပုံများကို naythar.multiply.com/photos/album/26 တွင် ကြည့်ရှုနိုင်ပါသည်။

www.naythar.org မှ ကူးယူဖေါ်ပြပါသည်။